Ég kynntist dr. Sigurði Árna Þórðarsyni fyrir 6 árum þegar ég hóf störf í Neskirkju við Hagatorg. Sigurður Árni hefur á þessum árum verið mér fyrirmynd í starfi, uppspretta fræða, náinn vinur og öflugur hvetjandi leiðtogi. Á okkar fyrsta fundi fór Sigurður að hrósa mér fyrir bjart yfirbragð og hláturmildi og man ég að viðbrögð mín við hóli hans voru blendin. Mér þótti hálft í hvoru óþægilegt að vera hrósað á þennan hátt en leyfði mér að trúa einlægni orða hans. Mér hefur lærst af samstarfi okkar og vináttu að þessi fyrstu viðbrögð Sigurðar, að draga fram það jákvæða í mínu fari og nefna það, eru honum eðlislæg. Leiðtogastíll Sigurðar Árna felst í því að hlusta á og greina fólkið sem er honum samferða, að laða fram það besta í samstarfsfólki sínu með því að lyfta upp kostum þeirra og hjálpa því að láta galla sína ekki þvælast fyrir.

Ég tel að dr. Sigurður Árni sé kallaður til að verða biskup íslensku þjóðkirkjunnar. Sú sannfæring mín byggir á mörgum þáttum en ég vil draga fram þrennt sem ég tel að muni verða kirkju og þjóð til heilla.

Framsýnn.

Sigurður Árni er framsýnn leiðtogi. Hugmyndir hans um framtíð kirkjunnar byggja á mannvirðingu og elsku. Hann hefur djúpan skilning á því að framtíð þjóðkirkjunnar veltur á því hvernig kirkjan sinnir börnum, unglingum og ungum fjölskyldum. Öflugt æskulýðsstarf og barnakórastarf dregur fjölskyldur til kirkjunnar og kallar ungt fólk til að láta sig kirkjuna varða. Sem biskup mun Sigurður Árni reynast málsvari æskulýðsstarfs innan kirkjunnar. ,,Til að kirkjan eigi sér framtíð þarf æskulýðsstarf að vera forgangsstarf þjóðkirkjunnar (SÁÞ)“

Fræðimaður.

Dr. Sigurður Árni er mikilsvirtur fræðimaður á sviði guðfræði, öflugur greinandi og framúrskarandi fræðari. Aukið menntunarstig þjóðarinnar kallar á að fyrir kirkjunni fari maður sem hafi getu til og áhuga á að fjalla um guðfræði og samfélag á öllum sviðum umræðu. Kirkja og háskóli eiga samleið og til að kirkjan geti átt í öflugu og lifandi samstarfi við háskólasamfélagið þarf kirkjan á fræðimanni að halda. Sem guðfræðingur er dr. Sigurður Árni óhræddur við að takast á við ögranir nútímafræða og óþreytandi í að draga fram það besta sem íslensk kirkjuhefð hefur fram að færa.

Fráskilinn.

Sem sálgætir og prestur nálgast Sigurður Árni fólk af djúpstæðri visku. Viska hans er sprottinn af þeirri eftirsóknarverðu reynslu að hafa unnið sig farsællega úr vonbrigðum og áföllum lífsins. Sigurður Árni ber ekki yfirbragð þess sem aldrei hefur reynt erfiðleika og leyfir sér því að setja sjálfan sig á háan hest gagnvart öðrum. Þvert á móti mætir hann fólki í erfiðum aðstæðum sem jafningi og vinur og vinnur starf sitt af mikilli fagmennsku. Það hef ég sjálfur reynt og orðið margoft vitni að á okkar vinnustað.

Þau hjón, Elín Sigrún og Sigurður, eiga fallegt heimili og þar eru gestir umvafðir hlýju og kærleika. Heimilið ber þeirra fegurstu kostum vitni. Fuglafóður og ávaxtatré í garðinum bera vott um djúpa virðingu fyrir náttúru og umhverfisvernd, listaverk þeirra og bækur veita innsýn í menningarþorsta, leikföng á stangli sýna að þar er rými fyrir börn og gestrisni þeirra endurspeglar sanna mannelsku.

Ég styð dr. Sigurð Árna Þórðarson til biskupsþjónustu.

Þegar nafn Sigurðar Árna Þórðarsonar var nefnt í sambandi við biskupskjör hugsaði ég með mér; “ Já, hann hefur svo sannarlega það sem til þarf  í það embætti: sanngjarn, heiðarlegur og fylginn sér. Svo er hann mjög nærgætinn og hjartahlýr“.

Það er svolítið sérstakt hvernig okkar kynni komu til og ég trúi ekki á tilviljanir.  Fyrir um 8 árum missti ég pabba minn. Stuttu síðar skruppum við hjónin í vetrarsólina á Kanaríeyjum. Í sömu ferð voru þau Sigurður og Elín, í sama tilgangi, sorgarúrvinnslu eftir móðurmissi beggja. Mér er það minnisstætt þegar við settumst saman í matsalnum á hótelinu, þreytt og tætt eftir flugið og fórum að spjalla saman. Þannig hófst okkar vinskapur.

Sigurður Árni er þolinmóður maður og hlustar vel.  Það fékk ég að reyna þegar ég þurfti nauðsynlega á hjálp að halda með erfið mál sem ég hafði glímt við allt of lengi.  Þá kynntist ég prestinum og sálgæsluhæfni vinar míns.  Þetta var fyrir nokkrum árum og ég er honum svo innilega þakklát fyrir þá hjálp sem hann veitti mér þarna.  Það var ekki skyndilausn heldur varanleg niðurstaða.

Það er tæpast hægt að tala um Sigurð án þess nefna Elínu. Þau eru samrýnd hjón, svo ekki sé dýpra í árinni tekið. Það vita þeir sem þau þekkja. Þau eiga fallegt hjónaband og styðja hvort annað. Með eindæmum hláturmild og gott að vera í kring um þau.  Svo má ég til með að nefna það hér að mér finnst alltaf svo ljúft þegar menn tala fallega um móður sína og eiginkonu. Ég kann að meta það.

Kynni mín af Sr. Sigurði Árna ná aftur til þess tíma er ég var skólastjórnandi í Vesturbæ og börn hans voru í Hagaskóla.

Ég hef fylgst með honum í starfi við Neskirkju, sem er mín sóknarkirkja, og veit af reynslunni að þar fer maður sem á gott með að ná til breiðs hóps sóknarbarna, bæði þeirra sem sleppa aldrei úr messu og þeirra sem koma sjaldnar. Hann talar beint til safnaðarins og varpar fram spurningum sem fólk þarf að svara og getur auðveldlega fundið svör við.

Hef þegið frá honum góð ráð, ábendingu sem var ekki patentlausn heldur leiðsögn um skref sem þyrfti að taka. Sr. Sigurður Árni hefur í sér hirðis-gen og leysir vel af hendi sitt starf sem hlustandi og ráðgjafi. Svona mann þurfum við í forystu kirkjunnar á nýrri öld.